道風山上有孫中山嘅題字？

之前阿史都同大家介紹過喺沙田站嘅後山之上，有一座道風山基督教叢林，而喺呢個宗教建築群唔單止有曾經介紹過嘅12米高巨型十字架、中西合璧嘅建築之外，原來仲有一個位置係有國父孫中山嘅題字。到底係邊個位置呢，阿史今次就同大家介紹下啦！

之前都同大家介紹過，全稱道風山基督教叢林嘅道風山其實係由一個西方傳教士艾香德牧師所興建嘅基督教建築群，由於當時想令更多華人可以接觸到西方宗教，所以喺興建呢個建築群嘅時候就特意用到中國園林風格佈置成個範圍、其中一座「聖殿」更用到佛教寶塔外形設計，呢幾個地方都真係幾有睇頭！

言歸正傳，咁到底道風山上邊個位置係有孫中山嘅題字呢？原來就喺十字架附近。由主建築群行到去外圍小徑通過「博愛門樓」之後，其實後方正正就係生命門，而喺呢座牌樓式窄門之上寫有《馬太福音》字句，就係由孫中山提字，行過路過都真係未必知啊！