「饅頭」嘅起源係因為一種恐怖嘅習俗？

今時今日去到茶樓食中式包點，經常都會見到饅頭呢種無肉無餡嘅食品，但史友們又知唔知其實呢樣食物嘅起源都真係幾血腥下！

相傳喺三國時期，喺諸葛亮帶領蜀國大軍「七擒七縱孟獲」之後，諸葛亮帶住大軍班師回寓，但係當佢哋去到瀘水準備要過河嘅時間，就遇到狂風暴雨、江河氾濫令到佢哋無辦法可以過到河。而當時已經歸咗降嘅孟獲就提出，由於呢個地方長年征戰，所以唔少冤魂都喺呢個地方作怪，不如就接照古老嘅習俗貢獻上七七四十九個人頭平息冤魂。

諸葛亮精通天文地理，心知道呢啲傳統觀念係仲未開化，但又想令到佢哋心服口服，於是心生一計就用麵粉做成人頭形狀，喺入面塞入牛、羊肉，蒸熟後替代人頭拜祭。孟獲半信半疑遵循軍令，仲將呢啲替代品掟入江河，結果冇幾耐個天真係放晴，而孟獲就更加心悅誠服。之後饅頭嘅做法就喺中國流傳，甚至仲出現埋冇肉嘅版本。