沙頭角有座「發達堂」 建築材料竟然有豬血？

繼續同史友們介紹一啲香港重要嘅歷史建築，沙頭角嘅位置偏僻，加上唔少地方都係禁區，所以對唔少香港市民嚟講呢個地方都係有些少神秘。而今次阿史就想同大家介紹下呢個地方入面嘅一座建築物，名為「發達堂」。

「發達堂」位於沙頭角下禾坑，雖然現時已經被列為法定古蹟，但據講入面仍然係有人居住，到底係咩回事呢？先由「發達堂」嘅歷史講起，呢座建築物係由禾坑李氏宗族後裔李道環有關，喺19世紀嘅時候佢就去到越南謀生，後來就同家人返到香港決定喺下禾坑定居，於是喺1933年佢嘅四個仔就組成組成「李道環祖」受託人興建發達堂。

就咁由外面睇落去，發達堂樓高兩層，正門、多排窗戶均裝上金屬製中式趟門同埋金屬窗罩，係經典嘅海外歸僑採用嘅風格。但實際上呢座建築當然唔單止咁，康樂及文化事務署早年就為呢座建築做過油漆橫切面分析、建築木材樹種鑑定、屋頂瓦片等等分析，研究就發現原來建築材料當中係加入過豬血、屋頂嘅瓦片又係用咗「客家式人字」方式排列疊成，對了解早年香港嘅建築史有相當重大嘅作用。