中國體育史上首個世界冠軍 筲箕灣男孩容國團

呢幾日阿史都同大家介紹到「乒乓外交」嘅故事，而提到中國乒乓球嘅發展史，有一個人真係不得不提，事關中國體育史上第一個世界冠軍就係由佢拎返嚟，而呢個人就係自幼喺筲箕灣山邊木屋區長大嘅容國團。

容國團出生喺1937年嘅香港，自幼就因為家貧冇乜點讀書，但就喺乒乓球既有天賦又想當有耐性，年紀輕輕就已經拎過公開賽冠軍，仲喺19歲嘅時候擊敗日本國家隊嘅世界冠軍荻村伊智朗令到佢聲名大噪。咁好地地嘅一個人才，又係點解喺香港冇機會發展呢？

原來當時容國團係喺左派工會工作，亦都係因為呢個原因受到乒總歧視，冇畀佢出戰1957年亞洲錦標賽，喺得到朋友鼓勵下，容國團就決定返到內地發展，為中國國家隊而戰。容國團先係入讀廣州體育學院，好快就已經拎到全國乒乓球錦標賽男單冠軍入選國家隊，佢當時立下豪言壯言，表明要喺「三年奪取世界冠軍」。結果，佢就喺1959年西德舉行嘅25屆世界乒乓球錦標賽上，擊敗匈牙利名將西多，為中國奪得第一個乒乓球男單世界冠軍。