以往阿史都同大家介紹唔少傳奇人物,佢哋都有一個共通點,就係為國家嘅發展犧牲咗自己唔少時間同心血。要一個國家得到發展,除咗有赫赫有名嘅傳奇人物努力之外,同時都有唔少普通人努力,所以今次阿史就想同大家介紹一批人,佢哋就係中國第一批女飛行員。

飛行員大家都應該聽唔少,但點解冇啦啦要特別培養女飛行員呢?故事就要由1950年代初講起,當時時任全國婦聯鄧穎超就同周恩來提議培養第一批女飛行員,呢個提議係基於幾個原因,第一個原因當然係希望咁樣提高中國婦女地位,而第二個原因就係因為考慮到抗美援朝嘅需要。當時新中國嘅空軍空戰經驗缺乏,但對手美國就係有住1,200幾架戰機,平均飛行時間都有1,000小時以上,所以如果可以培養埋女飛行員,無疑都係可以加強到整體軍隊嘅實力。於是喺1951年初,呢個決定亦都得到毛澤東同意,並且向全國軍區招募第一批女飛行員進行訓練。

結果喺1952年3月8日,北京西郊機場舉行新中國第一批全體女飛行員試飛典禮、各國駐華使節的夫人以及一眾中外記者喺西郊機場見證女飛行員受閱起飛典禮。而呢批女飛行員後來都喺抗美援朝戰爭奉命組建成航空兵部隊,執行過唔少空運任務。

原圖嚟自網絡