「宰相肚裏可撑船」呢句說話相信唔少史友們都會聽過,甚至仲知道呢句說話係用嚟形容人寬宏大量、極有氣度。之但係,唔知大家又有冇諗深一層,到底呢句說話係點嚟,當中所講嘅「宰相」又係邊位呢?

要介紹呢句說話,就要由宋朝嘅變法家王安石講起。王安石喺中年喪妻,後來就娶咗一位妾侍,當時王安石就已經貴為宰相,但就由於公務繁忙,經常都冷落咗呢位妾侍。結果冇幾耐,呢位妾侍就同府上嘅僕人開始偷情。呢個消息好快就傳遍府上,而王安石為咗可以查明真相,就喺一個晚上假扮外出,但實際就喺花園偷偷觀察。

結果當晚王安石就真係聽到妾侍同埋僕人喺房間內偷情嘅聲音,本來王安石去上前拆穿,但諗諗下發現自己貴為宰相,呢件事傳出去對自己名聲都唔太好,於是就扮鳥叫嚇走果位年輕僕人。妾侍就知道王安石識穿佢偷情一事,有一次佢就跪喺王安石面前吟咗一首詩,其中就有兩句係「大人莫見小人怪,宰相肚裏能撑船。」

聽完呢句說話,王安石就覺得,自己已經係花甲之年,妾待要偷情都唔怪得晒妾侍,於是佢就畀咗啲錢妾侍,等佢可以同果位僕人成親,所以後來「宰相肚裏能撑船」就被理解成寬宏大量喇!

原圖嚟自網絡