尋日阿史就同大家介紹到中國軍技室破譯日軍頭目山本五十六出巡密電，結果消息就通知咗畀美方，最終準確擊中山本五十六座機。而講到破譯密電嘅呢件事，喺戰亂嘅年代就曾經有一位奇才，佢叫做池步洲。

池步洲出生喺1908年一個貧困嘅農家，因為屋企貧困所以佢去到12歲先至可以讀書，但當時佢就以優秀嘅成積喺福州英華書院畢業仲保送到東京大學學習機電專業。池步洲喺東京大學畢業之後，1934年就去咗早稻田大學工學部學習，冇幾耐仲娶咗一位日籍女子為妻，生咗一子一女。

去到1937年七七事變爆發之後，佢一家人就選擇返到中國，經同學介紹之下加入「機密二股」參加破譯日軍密電碼工作，直到1939年3月為止，佢成功破譯日本外務省發到世界各地幾百封密電。而講到佢最威水嘅一件事，莫過於係日本偷襲珍珠港事件嘅破譯工作。

據講池步洲當時就通過破譯電文，發現日軍對珍珠港嘅美軍艦隊情況有具體嘅認知，並且喺12月2日就截獲密電「帝國將採取行動」。經過一輪分析，佢確信日本會偷襲珍珠港，而佢亦都將呢個消息上報並且轉報咗畀美方，只係當時美方唔相信中方可以破譯到電報，所以就冇進一步嘅防備。

原圖嚟自網絡