近排內地就有一套鐵達尼號紀錄片上映,呢套紀錄片嘅名就叫做《六人》,係由曾經擔任《Variety》雜誌中國首席記者嘅英國導演羅飛(Arthur Jones)執導,當中就講到有關六位華人含冤百年嘅事。

喺1912年4月,當時英國皇家郵輪鐵達尼號航行之時不幸喺北大西洋撞上冰山,呢場事故造成超過1,500人死亡,而當時其實係有6位華人倖存者。據英國媒體BBC報導,當年一共有8個華人喺船上,其2人喺事故果陣就意外身亡,有5人就喺一個救生艇上獲救,另1人就喺海面獲救。咁點解冇啦啦大家又會關注呢6位華人呢?

原來當年喺事件曝光之後,呢6位華人抵達到紐約果陣,唔單止冇得到公平嘅對待,而且仲被移民官刻意針對,隨即驅逐出境。而關於呢幾位華人嘅遭遇,羅飛就組成一個歷史同埋社會研究小組追查,就發現原本呢幾位華人都係三等艙乘客,佢地分別係方榮山(Fang Lang)、李炳(Lee Bing)、鍾捷(Chang Chip)、亞林(Ah Lam)、嚴喜(Ling Hee)、胡中(Choong Foo,音譯)、林倫(Len Lam,音譯),李林(Lee Ling,音譯)。

8名華人都係職業水手, 1912年被船運公司派往美洲到加勒比海港口工作,但喺事故發生之後就被《排華法案》拒絶入境,甚至仲有媒體刻劃影射,令到當時嘅人認為呢班「倖存者為登上救生艇而喬裝成為婦女」,但呢啲指控婪本就冇任何證據,甚至其中一位華人倖存者方榮山仲積極拯救在場遇難者,真係諷刺啊!

原圖嚟自網絡