近代中國科技之所以可以有突飛猛進嘅發展,全賴有幾代人唔計較個人得失、全力堅持研究,而今次阿史就想為大家介紹一下被稱為「中國衞星之父」嘅孫家棟。

孫家棟出生喺1929年,年少時因為戰亂而失學,直到1947年先至考入哈爾濱工業大學預科班專修俄文、後來就加入中國人民解放軍空軍,亦都去過蘇聯茹科夫斯基空軍工程學院學習。而喺佢回國之前,就因為見過當時訪問蘇聯嘅毛澤東,令佢選擇咗一條比較難行嘅路,就係加入錢學森主持主持嘅國防部第五研究院從事飛彈研究,由設計部副主任一路做到第七機械工業部第五研究院院長、航空航天工業部副部長。

咁史友們可能會好奇,孫家棟具體嘅工作又係做啲乜?其實就係從事飛彈、衛星設計同埋研製工作,簡單嚟講就係中國試驗同步通信衛星嘅總設計師。時間去到1967年,孫家棟擔任第一顆人造衞星總體設計師,並負責重組衞星研究隊伍,組成「航天18勇士」。去到1970年,喺解決重重困難之下,「東方紅一號」發射成功;並且1971年「實踐一號」衛星亦都發射成功;後來中國第一顆返回式遙感衛星、第一顆同步試驗通信衛星「東方紅二號」、2003年任中國探月工程都係由孫家棟擔任總設計師研發,難怪佢會被稱為「中國衞星之父」。

原圖嚟自網絡