繼續同史友們介紹一啲香港極具歷史價值嘅古蹟，上次就同大家講完沙頭角嘅發達堂，咁就有史友希望阿史繼續介紹類似嘅「豪宅」，咁今次就同大家講下呢座位於元朗博愛醫院旁嘅歷史建築——潘屋。

潘屋昔日係一座大宅，佢所在之處就係新界元朗凹頭，博愛醫院旁邊。呢座曾經相當豪華嘅大宅早喺1932年就開始興建，係當時原籍廣東梅縣客家商人潘君勉為紀念父親潘蔭華而興建，所以當時係以「蔭華廬」命名。潘屋以傳統客家設計興建，為咗貫徹呢種風格，當時潘君勉係專程由鄉下請咗四個工匠嚟到香港，依照祖屋嘅布局以「兩堂兩橫」典型設計，並且所有材料都係由廣州、佛山、汕頭等地採購運港，足足用咗兩年時間先至建成。

潘屋又有另外一個名叫做「獅子屋」，如果大家細心觀察就會發現，原來正門兩側樑架上分別雕有一對貼金木獅子、牆上就有兩對著色陶獅子，加加埋埋有成八隻咁多。

除咗建築風格獨特，其實潘屋都係大有來頭。屋主潘君勉係旅港嘉應商會始創辦人、香港南洋輸出入商會首名主席，佢曾經支持同盟會進行革命活動，孫文亦都曾經為佢題字、潘君勉本身又係葉劍英好朋友，所以當葉劍英同周恩來嚟到香港果陣，兩人都曾經入住過潘屋。而到咗日佔時期，呢度就被日軍睇中咗，成為元朗軍事總部。時至今日，呢間客家古典村屋就荒廢咗，之後會點樣發展就真係不得而知喇！

原圖嚟自網絡