屋建會佔地最少嘅屋邨——西環邨

又係時候同史友們介紹一啲香港特色嘅公共屋邨，之前就同大家講過加多近街嘅由來，而喺呢條街附近就有一座公共屋邨，就係1958年先至入伙嘅西環邨。

喺興建西環邨之前，其實原址都唔係一塊平地，而係一座都幾陡峭、屬於魔星嶺嘅山丘，直到1955年政府宣佈喺呢個地方興建房屋嘅時候，先至將呢個計劃暫時命名為「加多近街房屋計劃」，亦都係屋建會轄下規模最小嘅屋邨。

喺設計西環邨嘅時候，屋建會就因為財政問題同埋建築成本上升，令到計劃嘅規劃有所改變，最後喺唔影響人均面積標準之下，就降低嘅室內設計嘅標準、亦都取消咗獨立信箱。而由於西環邨位於多個山坡之上，山坡最高點又同最低點有一定差距，斜度仲達到45度。最後建築師就用咗現有地形，建成五座高度不一嘅大廈，由10至14層不等，而單位嘅面積亦都有幾款唔同嘅大細。