「閉門羮」係點嚟？

今時今日形容去到唔岩時候入唔到屋、被屋主拒絕入門，我哋都會用到「閉門羮」嚟形容，之但係再諗深一層，到底「閉門羮」又係咪真係一種菜式嚟呢？今次阿史就同大家介紹下啦！

其實「閉門羮」呢個詞最早係出現喺唐代馮贄《雲仙雜記》，當中就講到「下列不相見，以閉門羹待之」，而呢一句就真係講開有段故。原來喺唐代果陣，宣城就有一位妓女叫做史鳳，佢生得如花似玉，琴棋書畫皆通，令到唔少年輕男子都慕名前往拜訪。由於人數太多嘅關係，史鳳都會要求前往嘅男子作一首詩，聽完詩文佢先會決定見唔見果位客人。咁問題嚟喇，如果史鳳唔想見果位客人，又會做啲咩呢？

答案就係喺門前放上一碗羮，見到呢碗羮嘅客人就會知道係拒絕會面咁解，久而久之呢個就成為「閉門羮」喇！而據講實際上嘅「閉門羮」就係由豆腐同埋鴨腸整成嘅。