「救時宰相」係指邊一位？

繼續同史友們介紹一啲特別嘅歷史人物，「宰相」呢個官職大家都應該聽唔少，至於歷史上其實有一位人物先後三次出任宰相，仲被後世甚至仲尊稱佢為「救時宰相」，今次阿史就同大家介紹下啦！

阿史今次要介紹嘅正正就係姚崇，佢分別係武則天、中宗、玄宗在位時嘅宰相，一共在位十幾年。姚崇原名叫做姚元崇，但後來因為要避開「開元」年號之諱，就改名叫做「姚崇」。姚崇經科舉入仕，最初係被授濮州司倉參軍，後來又做過司刑丞，因為處理案件公正嚴明而不斷晉升，仲受到武則天賞識成為兵部侍郎。

姚崇之所以被稱為「救時宰相」，係因為佢嘅一生同唐朝嘅興盛有住重大嘅關係，喺武則天在位年間，佢就為武則天剖析契丹侵擾河北形勢、解決重用酷吏嘅問題，令到武則天升佢為同中書門下三品（宰相加銜）；而喺中宗、睿宗時期，佢就分別兩次被貶為刺史，但仍然為政甚得民心，後來去到唐玄宗即位之初，佢就成為兵部尚書，加封為梁國公，仲提出「姚崇十策」以及杜絕蝗災。結果喺呢啲意見被採納後，開元年間嘅經濟同社會都得到巨大發展，姚崇就被稱為「救時宰相」。