繼續同史友們介紹一啲有趣嘅歷史故事,中國古代四大美人「沉魚」、「落雁」、「閉月」、「羞花」嘅典故大家都應該聽唔少,但四大妖姬大家又知唔知有邊四位呢?今次阿史要介紹嘅呢位正正就係「一笑傾城,再笑傾國」嘅人物。

心水清嘅史友應該都會估到,今次阿史想介紹嘅就係褒姒喇!據《東周列國志》入面記載,褒姒原本係一個棄嬰,被一對做買賣嘅夫婦收養,長大之後就因為周幽王征伐有褒國,褒人為咗自保就獻上褒姒乞降。自此之後,褒姒就成為周幽王嘅寵妃,周幽王唔單止為佢廢咗王后申氏、太子宜臼,仲將褒姒立為王后,伯服為太子。

唔單止咁,周幽王因為知道褒姒過唔慣宮中生活,又因為養父被殺而悶悶不樂,於是周幽王就發重賞希望可以令到褒姒露出笑容,結果當時虢國石父獻出「烽火戲諸侯」嘅鬧劇,結果就令到褒姒真係笑咗出嚟。而去到公元前771年,當時犬戎兵至,雖然幽王再燃烽火,但就因為上次「烽火戲諸侯」嘅事,今次諸侯再冇出到援軍,周幽王被殺,褒姒被擄。

所以後來喺《史記·周本紀》就提到「褒姒不好笑,幽王欲其笑,萬方故不知」,一笑傾城、再笑傾國就係講緊呢位女子喇!

原圖嚟自網絡