九龍東唯一法定高速公路——觀塘繞道

近年嚟觀塘都成為唔少工廠、寫字樓嘅集中地，每逢返工放工時間，都會有大塞車嘅情況出現，甚至仲有網民開埋啲專頁每日「問候」觀塘，可想而知情況係幾嚴重。唔講又唔知大家知唔知，其實觀塘呢個地方係有一條叫做觀塘繞道嘅路，今次阿史就想同大家介紹下！。

其實喺觀塘區，就有一條喺1989年建成嘅道路，前稱觀塘支路，係連接住藍田將軍澳道、鯉魚門道、九龍灣大老山隧道等嘅一條九龍東唯一法定快速公路。話就話喺觀塘，但其實呢條全長6公里嘅道路係避開晒觀塘市中心地區，只係為咗方便市民可以好快咁前往將軍澳同埋港島東。

今時今日嘅觀塘繞道就已經係可以由鯉魚門道去到大老山隧道，但其實成個工程係分咗三期建成，第一期就係1989年嘅鯉魚門道至偉業街段、第二期就係1991年由偉業街至啟福道段、至於最後一期就係1991年啟福道至大老山隧道段。而呢次工程建造嘅目的除咗係方便駕駛者之外，亦都係希望減低汽車噪音對麗港城、麗晶花園、彩虹邨等居民嘅影響，真係幾有意義架！