每年嘅國慶節、抗日戰爭勝利紀念日、烈士紀念日等等，官方都會舉行敬獻花籃嘅儀式向我哋嘅先烈表達敬意，而呢啲儀式舉辦嘅場地正正就係人民英雄紀念碑。到底呢塊莊嚴嘅石碑係幾時同埋因為咩原因建成呢？阿史今次就同大家介紹下啦！

故事就要由1949年9月30日講起，當時中國人民政治協商會議第一屆全體會議就住一件事進行咗決議，就係為咗紀念人民解放戰爭同埋人民革命當中犧牲嘅人民英雄，當時就決定要喺首都北京天安門外建立人民英雄紀念碑並且喺同日舉行咗一個奠基典禮。

而去到1952年8月1日，人民英雄紀念碑建造工程正式開工，當時就集結咗全國最頂尖嘅建築專家同埋美術工作者，梁思成、范文瀾都有份參與其中，仲有一班專家組成專門為研究浮雕畫面所需嘅史料題材進行研究。

而喺1958年4月22日，人民英雄紀念碑正式建成，成塊紀念碑高達37.94米，碑基佔地約3100平方米，一共用咗1.7萬塊花崗石、漢白玉石建成，碑身正面仲寫有毛澤東親自題寫「人民英雄永垂不朽」八個大字，而背面就係由毛澤東起草、周恩來題寫嘅「人民英雄紀念碑」碑文，係全國人民懷念革命先烈嘅重要標誌。

原圖嚟自網絡