繼續同史友們講一啲三國嘅典故,上次就同史友們分享完「身在曹營心在漢」,今次阿史就想同大家介紹下「劉備摔孩子」。

喺《三國演義》有住唔少經典嘅故事,其中一個就係「劉備摔孩子」。呢個故事發生喺長坂坡之戰後,當時劉備就被曹操打到落荒而該,連自己老婆同埋個仔都失散埋,仲被曹軍捕獲。而當時為咗救返甘夫人同埋劉禪,當時嘅大將趙雲就七進七出殺入曹軍陣型,最後成功將兩人送返去劉備手中。

本來屬下趙雲幫劉備救返個仔都係應份嘅事,之但係當時劉備眼見趙雲多次身陷險境,就好感慨咁講「為汝這孺子,幾損我一員大將!」講完之後,佢就抬起劉禪,扮到好似想掟佢落地下咁,而趙雲見到咁嘅情況,仲即時阻止劉備話「雲雖肝腦塗地,不能報也。」

由於「劉備摔孩子」呢個舉動後來令到趙雲忠心不二,所以後世解讀呢個動作,就認為係收買人心嘅表現,所以「劉備摔孩子」亦即係收買人心嘅意思。

原圖嚟自網絡