「橫瀾燈塔」係咩樣？

燈塔類嘅古蹟阿史過往都同大家介紹過，雖然做得燈塔管理員都預咗要去到偏僻嘅地方長時間工作，之但係香港有個地方嘅燈塔直頭係位於孤島之上，連食水都未必有，阿史今次就同大家介紹下啦！

阿史所講嘅就係位於蒲台群島南面嘅橫瀾燈塔喇！呢座燈塔係香港現存嘅戰前燈塔之一，而且佢嘅歷史係相當長，有超過一百二十年嘅歷史，同時被列為香港法定古蹟。橫瀾燈塔早喺1893年就已經開始建立，係由清政府嘅上海皇家海關總稅務司聘請巴黎 Barbier and Co 公司建造同管理。而去到1898年，由於新界租借咗畀英國，所以屬於新界一部分嘅橫瀾燈塔亦都由當時港府管理埋。唔講大家都未必知，橫瀾燈塔其實係當時亞洲最先進嘅燈塔，設有一座訊號燈並以石油作為燃料推動運作，而且旋轉照明儀器仲係浮喺水銀之上，當時亞洲都只係得兩座咁嘅燈塔。

咁有些少地理常識嘅史友應該都知道，其實橫瀾島嘅位置都真係幾偏遠，交通亦都相當唔方便，早年負責接載員工同埋運送物資嘅駁船只會兩個星期先開一次，所以供應到畀島上員工嘅新鮮食物少之又少，為咗解決呢個問題，當地嘅員工直頭要喺島上釣魚、種菜，真係估佢唔到！