「司馬昭之心」真係路人皆知?

繼續同史友們介紹三國嘅一啲經典典故，上次就同大家講完臭皮匠諸葛亮，而今次就當然要講下另一句經常都聽到嘅說話，就係「司馬昭之心路人皆知」喇！

相信有讀過三國歷史嘅史友，可能都會知道司馬昭係邊個，司馬昭係司馬懿嘅仔，係魏國嘅大將。喺三國鼎立嘅時代再去到最後魏國勝出前後，當時司馬懿就殺咗輔政大臣曹爽，掌握魏國實權；後來喺佢死後就由佢個仔司馬師掌權，仲廢咗魏少帝曹芳改立曹髦、殘殺唔少大臣。而司馬師壽命亦都唔長，後來由佢個細佬司馬昭做大將軍，內外勾結。

當時曹髦其實已經對司馬昭嘅專橫跋扈起晒戒心，仲諗盡方法想除去佢。有一日曹髦召見三個親信想除去司馬昭，仲講出口話「司馬昭之心，路人皆知也！朕不能坐受廢辱，今日當與卿等自出討之。」只可惜司馬昭勢力太大，曹髦最後都係死於司馬昭親信手下，所以後世就用「司馬昭之心，路人皆知」嚟形容有明顯野心嘅人。