一場由青年學生推動的愛國運動——五四運動

又嚟到一年一度嘅五月四日，相信唔使阿史講，史友們都會知道五月四號係五四運動發起嘅日子。咁喺呢個咁特別嘅日子，阿史就當然要同大家應一應節，介紹返呢場愛國運動係點樣發生啦！

提起五四運動，就當然要先由當時嘅時代背景講起。喺一戰過後，其實當時中國係屬於戰勝國之一，本應係可以收返戰敗國德國喺山東嘅權益。之但係當時參與巴黎和會嘅國家就決定將山東嘅權益轉讓畀日本，結果就令到當時中國民眾積壓已久嘅民族情緒爆發。

喺1919年5月4日，北京學生開始遊行示威，抗議巴黎和會上有關山東問題嘅決議。遊行其中一個目的就係敦促政府不可簽約，仲要求懲處相關官員。當日天安門廣場聚集北京13家大學逾3000名學生，學生高呼住「外爭主權，內除國賊」嘅口號，遊行仲發展成火燒趙家樓、痛打章宗祥嘅事件，而喺五月四號之後，市面上亦都發生罷課、罷市、罷工等事件，甚至仲促發後來新文化運動嘅發生，意義重大。