波蘭業餘考古學家 發現逾600年歷史長劍

早兩日就同大家講到埃及嘅新考古發現，就係搵到全球第一具孕婦木乃伊，而喺世上另一個地方，亦都有一位波蘭業餘考古學家陰差陽錯搵到一件極具歷史價值嘅文物。

事源就係呢位叫做梅德韋杰夫（Alexander Medvedev）嘅業餘考古學家過往都有用到金屬探測器四圍發掘，而呢一次佢就搵到好多件中世紀嘅古物，就好似有長劍、金屬劍鞘，一條腰帶、兩把刀，而當中呢件中世紀長劍仲保留得幾良好，考古學家就認為係公元1410年格倫瓦德戰役參戰士兵裝備，並且係幾十年難得一見，形容係價值連城。

翻查返歷史，格倫瓦德戰役相信係發生喺1410年7月15日，係當時中世紀最大規模嘅一場騎兵戰事，估計就有接近6萬人參加，接近一萬人死亡。而呢次發現相當重大，博物館同考古團隊認為仲有機會發掘到文物，所以發現文物地點就冇對外公布到。