剛才阿史就得知一個令人幾傷感嘅消息，就係有「香港播音皇帝」之稱嘅李我離世，享年99歲。

李我一生嘅事蹟阿史之前都同大家介紹過，李我，原名係李晚景，係香港50年代嘅播音皇帝，喺香港長大嘅李我，喺華仁書院畢業就跟媽媽學唱粵曲，13歲嘅時候亦都跟隨名導演湯曉丹學習編劇，仲曾經組過「新春秋劇團」到廣州演出，表演經驗相當豐富。

當時廣州風行電台台長聽到佢粵劇表演之後，就決定畀個機會呢個後生仔，咁就開始咗廣播劇主持嘅生涯。就係1946年，李我始創廣播劇《天空小說》！《天空小說》係佢嘅成名作，單憑幾十個字嘅大綱即席演繹，仲包辦廣播劇入面所有角色，呢個舉動轟動省城，唔少電台都爭相招攬佢加入。當年香港麗的呼聲重金禮聘李我加盟，一年之間多咗6倍訂戶。佢最紅果陣嘅人工仲多過當時嘅港督，真係唔簡單！