以往阿史喺介紹香港郵政嘅時候就有同大家講到全港現存歷時最悠久嘅郵局,而尋晚就有一件好不幸嘅事發生,就係呢座咁有歷史價值嘅建築物受到交通意外嘅波及受損。

赤柱郵政局建於1937年,係現存最古老並且仲運行緊嘅郵局,呢座位於黃麻角道2號嘅建築,係全港第十二間建成嘅郵局。早年赤柱雖然係個漁村,但就有唔少軍人駐守,所以赤柱郵局就有必要運作。郵局由於興建果陣正係英國國王佐治六世在位期間,所以兩面白色窗花都嵌有代表佐治六世嘅「GR」徽章。而呢座建築物其實喺七十年代曾經進行過擴建同翻新,但後來郵政署長譚榮邦嚟到郵局巡視果陣,就發現郵局建築結構出現問題,有滲水及倒塌危機。

原本郵局係面臨拆卸,但幾經考慮同計算成本之後,就決定喺2007年按照1937年果陣嘅原貌重建,連第一批人手自助郵票售賣機及、刻有GR徽章嘅紅郵箱都仲保留喺度。今次不幸受到交通意外波及,成架巴士撞咗埋去,暫時只係知道屋頂木製桁樑有明顯裂痕,希望冇事啦!

原圖嚟自網絡