繼續同史友們介紹一啲經常都會講到，但又唔太清楚當中意思嘅一啲詞語。喺廣東話當中，就有一句「摸門釘」係形容到訪其他人嘅屋企但無人應門，白行一場嘅意思。咁到底呢個情況同「摸門釘」之間有咩關係呢？阿史今次就同大家介紹下啦！

喺春秋時期，當時嘅門其實都已經好有設計，就好似《墨子·備城門》入面描述「門扇薄植，皆鑿半尺，一寸一涿弋，弋長二寸，見一寸，相去七寸，厚塗之以備火」，而呢句句子當中提到嘅「涿弋」，其實就係古代城門上用到嘅尖圓形木橛，佢哋大小、排序都有講究，並且表面仲會有一層厚泥土防火。

咁有史友可能會問，咁到底果時嘅門釘有咩用呢？門釘其實喺唔同時代都有唔同作用，喺最初嘅時候就係用嚟防衛，後來由於門釘嘅「釘」字同添丁嘅「丁」，所以後世就有唔少婦女都會專程摸一摸門釘求子。

上面講到嘅就係北方嘅習俗，咁南方又係點呢？喺以前廣東石歧就有一座關帝廟，每次墟期嘅時候都有唔少童工嚟到呢座廟門口希望可以搵到工，但由於佢哋數量太多，所以喺等待工作嘅時間都冇乜野可以做，只好摸下門釘。所以，後來就有人用「摸門釘」形容白行一趟喇！

原圖嚟自網絡