繼續同史友們介紹一啲關於三國嘅經典典故，之前阿史就同大家介紹過「三個臭皮匠」、「徐庶入軍營」等等嘅典故，而今次阿史就想講一講「士別三日，刮目相看」。

就咁提起呢句說話，大家都知名字面意思係解作人經過一段時間嘅努力之後有所改變，有住唔一樣嘅成就，令到身邊人都用唔同嘅眼光去睇佢，而呢句說話原來係同東吳嘅一位大將有關。

喺《三國誌．吳志．呂蒙傳》入面就提到呢個故事，當時東吳孫權嘅手下有一位叫做呂蒙嘅大將，佢由於年少嘅時候冇乜讀書，但武力相當犀利，所以當時大家都笑佢係「吳下阿蒙」，即係笑佢學識淺薄、行事粗魯。雖然呂蒙知道自己畀人咁樣笑，但咁樣都冇令到佢主動讀書。直到有一次孫權同佢講，就算自己又或者曹操等平時點忙都好，都總係手不釋卷，所以孫權都想呂蒙可以讀多啲書。

結果自此之後呂蒙真係發奮讀書，而喺呢個時候東吳另一位名將魯肅就出現喺呂蒙嘅軍營並且同佢飲酒傾計。喺言談之間，魯肅就發現呂蒙講野已經變得頭頭是道，已經唔係以前果個「吳下阿蒙」，佢就好感慨咁話「士別三日，當刮目相看」，後來就用呢句說話形容人脫胎換骨喇！

原圖嚟自網絡