近年嚟因為各種嘅原因,抵制其他國家嘅貨品、支持國貨都成為不少國人嘅主張,而喺當年嘅今日,其實就係近代中國第一次抵制洋貨嘅日子,到底呢件事係因咩而起,阿史今次就同大家介紹下啦!

其實早喺1860年代開始,美國嘅中央太平洋鐵路公司就已經喺中國招募唔少工人到美國做華工修築鐵路,但當呢班工人去到美國果陣,由於工作效率太高再加上美國本土嘅失業問題,就引嚟美國白人對呢班清朝移民產生歧視。而1880年代開始,美國國會就同法院一齊出手推動各種法案排華,就好似1882年美國排華法案、1894年《中美會訂限制來美華工保護寓美華人條款》等。

而成件事件嘅導火線就係1894年《中美會訂限制來美華工保護寓美華人條款》,呢條條約本身以10年為限,條件相當嚴苛,假如1904年12月7日之前兩國仲未商議就會自動延期十年。當時清政府係打算重新議定條約,美國國會內部就通過無限期延長該約,但當時海內外華人都係打算廢約,結果喺美國美國駐華大使柔克義到北京談判果陣,上海商會就喺1905年5月10日發起抵制美貨運動,全國各地都實行對美抵制,即係唔用美貨、唔用美國船隻、買辦、通事以及美籍人士。到底結果係點?阿史下回再同大家分解一下!

原圖嚟自網絡