尋日就同史友們講到，自從1880年代開始美國本土就產生歧視華人嘅情緒，朔至美國國會同法院都一齊出手推動各種排華法案，而當中一條實行咗十年嘅《中美會訂限制來美華工保護寓美華人條款》就喺1905年成為導火線，引發上海總商會發起抵制美貨運動。雖然話就話呢場運動喺上海發起，但原來當時最有成效嘅係喺廣州，阿史今次就同大家講一講啦！

喺1905年5月10日，喺上海總商會斥責美國政府排華政策同埋表示發起拒約運動之後，當時商會就遍電各省商會或商務局要求協力拒約、相戒不用美貨。但呢場運動實行咗兩個月之後都仍然未能令到美國政府改約，結果鐵業、機器業、洋布業、洋廣五金業、麵粉業、火油業、木業等七個大行業公所就唔入口美貨、亦都唔賣美貨，連帶仲有七十幾個行業加入，南京、蘇州、揚州、鎮江、青島、沙市、濟南等160幾個城市都有「拒約會」嘅成立。

而當中廣州嘅行動就相當精彩，當時仲被稱為「中國最排外城市」。事源就係當時拒約活動嘅三個廣州幹事馬達臣、潘信明、夏仲文知道美國支政府代表團，包括幾十名高官都會去到廣州，佢哋就連夜印製傳單，提醒全城轎夫勿為愛麗斯公主抬轎。得知呢個消息後，美國駐廣州公使雷優禮震怒並要求清廷處理。

而當時清政府真係拉咗呢三人入獄，三人喺獄中嘅書信傳出仲被轉載為報刊，內容就係叫國民「堅持到底，勿貽美人之譏，則仆死之日，猶生之年也。」結果呢啲咁煽情嘅內容就激起民眾義憤，「抵制美貨運動」完全由民間主導。

原圖嚟自網絡