呢兩日就同史友們講到近代中國第一次「抵制美貨運動」，當中就以廣州最有效。而認真追溯成件事，其實就係同鐵路華工表現太過勤力引嚟當地白人嘅種族歧視而起，咁到底當時太平洋鐵路嘅華工做過咩嚟呢？阿史今次就同大家介紹下啦！

喺晚清年間因為各種原因，唔少華人都被「賣豬仔」，除咗去南洋，另一個熱門嘅目的地就係美國啦，而喺美國當時就有一項極為龐大嘅工程進行，就係「太平洋鐵路」喇！呢項工程始建於1863年，喺鐵路建設初期其實就係美國內戰之後冇耐，美國政府就打算興建一條貫通東西岸嘅鐵路振興美國經濟。當時原本佢哋打算喺美國本土請五千個工人，但最後只係得幾百個美國人見工；而原本用開嘅黑奴就唔能夠再用，於是佢哋就諗到招募華工。

而睇返1860年代嘅數據，呢項鐵路工程全盛時期係有接近1.5萬華工參與，人口比例高達九成，而由於工程係要貫通美國東西岸，再加上當時挖掘機器嚴重不足，所以唔少華工都喺極其危險嘅情況下開山劈石，唔少人都因為咁而受傷，甚至死亡，特別係喺內華達山脈同埋尺唐納隧道呢兩段路上。

喺華人付出血汗之下，呢項艱難嘅工程得以提前7年建成，之但係當時美國就相當忘恩負義，其至喺儀式上致謝詞都冇提到呢班華人。犯下咁嚴重嘅錯誤，到底美國之後點收科呢？阿史下回再同大家分解。

原圖嚟自網絡