呢排東京奧運又再成為熱話，到底呢場奧運能唔能夠搞得成，其實都仲係未知之數。而講起奧運，其實有唔少人物同畫面大家都會歷歷在目，好似阿史咁諗起奧運就會即時諗起跳水項目，諗起跳水就會諗起呢位人物喇！

相信有返咁上下年紀嘅史友都會諗起，呢位人物就係已經退役咗嘅跳水運動員伏明霞喇！伏明霞早喺1990年就入咗國家隊，同年就已經喺美國嘅一場運動會拎到女子10公尺高臺金牌，認真唔惹少。而去到1991年，佢就以13歲之齡喺澳洲舉行嘅第6屆世界游泳錦標賽拎到女子10公尺高臺金牌，已經係史上最年輕嘅選手拎到世界冠軍。

以為咁樣就已經好勁？未算啊，去到1992年，當時14歲嘅佢拎到首次參加奧運嘅機會，並且喺巴塞隆納奧運會上都係喺10公尺高臺項目拎到金牌，完全打破咗中國同埋奧運會跳水歷史上最年輕奧運金牌得主嘅紀錄。伏明霞仲喺1996年嘅亞特蘭大奧運會衛冕女子10公尺高臺項目，仲拎埋3米彈板項目嘅金牌。

唔講唔知史友們又知唔知，其實伏明霞喺1996年之後就曾經退出過國家隊，去到2000年先重新參加返奧運，並且同樣拎得返3米彈板冠軍。呢次奧運入面更加同郭晶晶配合奪得雙人3米彈板亞軍，自此伏明霞就真係退出咗國家隊，大家就冇辦法見到呢位跳水皇后嘅英姿喇！

原圖嚟自網絡