《蘋果日報》呢個名，响港台兩地都可以話係有返咁上下負面，煽色腥假新聞嘩眾取寵乜都有。不過，台灣《蘋果日報》呢份報紙宣佈下星期開始唔再出紙，得返網上版，都可以話係台灣報業史上一次重要事件。

响2003年，香港壹傳媒就登陸寶島，响當地創辦《蘋果日報》，唔少人就將呢份台灣《蘋果日報》稱為「台蘋」，作為同香港《蘋果日報》區分出嚟。當年「蘋果登台」造勢方式都相當誇張，就係搵咗當紅女星鍾麗緹拍咗輯超級性感嘅相做宣傳，向街上大小廣告板廣告、巴士車身都見鍾麗緹身軀幾乎半裸嘅相。

而台蘋出現後，以小報形式經營，內容偏向煽色腥，更引入香港狗仔隊文明，大玩跟蹤揭秘爆私隱，將新聞報道徹底娛樂化。一向以文化掛帥嘅台灣報界，受唔住呢股歪風衝擊，流失咗大量讀者，因而紛紛倒閉。好多報紙又有樣學樣，大搞狗仔隊文化。所以，一直以嚟台島反蘋果嘅聲音都幾大，可惜唔少台灣人同香港人一樣，都係邊鬧邊睇。

近年，由於報紙市場受互聯網影響大受打擊，加上台蘋經營不善，賣盤消息不絕，最後走上停出紙嘅末路。