郊野公園旁有豪宅屋苑？

呢排天氣唔錯，阿史就去咗港島南區行下山。由紫羅蘭山行到孖崗山，又上又落都真係幾辛苦。記得當日有個同行者就問，咦？黃泥涌水塘上高，有個咁大嘅屋苑嘅？仲問個度唔係郊野公園咩？

同行人講緊嘅，就係南區著名豪宅屋苑陽明山莊。陽明山莊位於香港大潭水塘道，1981年動工興建，1988年首批住客開始入伙。呢個屋苑係由嚟自台灣嘅僑福建設企業興建，據陽明山莊網站資料顯示，僑福企業响1981年向當時政府購入大潭郊野公園地皮，動工興建陽明山莊。因此呢個屋苑三面係被郊野公園包圍住。至於點解以「陽明山」為命，好明顯就係因為借台灣陽明山之名。

可惜嘅係，阿史出身卑微，未入過去呢個豪宅屋苑，頂多係响電影中見到裡面係點。