唔知史友們最近有無入戲院睇《真三國無雙》電影版呢？呢套電影好唔好睇就見仁見智啦！不過就令阿史又睇返三國人物嘅故事（最近都寫多咗），今次就想講講王允，因為睇套電影就見到秦沛演呢個角色。

王允係東漢末年嘅著名朝臣，响《後漢書‧陳王列傳》有載，十九歲就做郡吏，後嚟因得罪宦官張讓而下獄，後尾得何進賞識重新做官，打算合謀盡誅宦官。後嚟被何進引召入京嘅董卓打持朝政，廢少帝改立獻帝，王允升任司徒。當時董卓對王允都相當信任，但王允「見卓禍毒方深，篡逆已兆」，於是搵司隸校尉黃琬、尚書鄭泰等謀誅董卓，可惜未能成事。後嚟潛結卓將呂布，使為內應，最終成功刺殺董卓。

成功誅殺董卓後，呂布就成為王允一個合作伙伴。不過王允消滅董卓後，剛棱疾惡，令群下不甚附之。甚至連同佢合作嘅呂布都同佢有所不和，好似呂布想以董卓財物班賜公卿、將校，但王允反對不從。當時由董卓引入關嘅涼州軍人，聽到王允會盡誅涼州軍人嘅消息，董卓原本嘅部下李傕見董卓女壻牛輔都死埋，諗住返去涼州就算，但之後佢聽從賈詡嘅建議，最後攻打長安。結果呂布兵敗退出長安，王允連同宗族十餘人被殺害。王允死後，天子感慟，百姓喪氣，不過就無人敢為王允收屍，最後平陵令趙戩棄官奔喪。

照咁睇，王允同呂布之間失去咗董卓呢位共同敵人，就好似唔多合作到咁喎。

原圖：電影《真三國無雙》劇照