中國閱兵禮賓車紅旗汽車

早幾日就同史友們介紹到我國第一架自行研發嘅車輛「東風」牌國產小轎車，而提到呢架車嘅時候，唔少史友都想阿史介紹埋另一款國產車，咁就當然冇問題啦！

阿史今次所介紹嘅正正就係中國閱兵指定嘅禮賓車，亦即係紅旗汽車啊！紅旗呢個品牌喺1958年成立，據講最初設計理念係依據前蘇聯豪華車嘅風格而設，而後來甚至仲引入過奧迪、林肯汽車嘅風格嚟設計，所以一直都係我國嘅豪華汽車品牌。

喺1958年「東風」出產之後，紅旗CA72就喺1959年問世。當時其實係中央希望可以喺建國十周年慶典上用上國產嘅高級轎車，所以當時一汽集團上下就喺冇完整圖紙、樣車嘅情況下總動員，喺短短一個月就成功整到一架樣車出嚟，並且進行多次改造實驗，最終以紅旗CA72命名，成為中國有編號嘅第一輛真正紅旗牌高級轎車。而呢款車喺1963年就停產，但只係生產咗202架，所以真係相當罕有。時至今日，紅旗就仍然係中國豪華汽車品牌，並且仲係中國閱兵禮賓車。