「牛虎銅案」係祭器？

早前就同大家講唔少三星堆嘅文物，唔少史友都覺得新奇又好睇，所以阿史都繼續同史友們介紹一啲我國嘅考古文物，今次就介紹下「牛虎銅案」啦！

就咁睇呢幅圖可能大家都唔太睇得明到底呢件器物係用嚟做乜，呢件喺1972年由雲南省玉溪市江川縣李家山古墓群第24號墓中出土嘅戰國時期青銅器，實際上係古代祭祀果陣用嚟盛載牛羊用嘅祭品器具。雖然呢件器物睇落好似好細，但其實佢長達76cm、高就有43cm，重量仲達到17公斤添！

唔講真係唔知，相比起其他器具，牛虎銅案可能唔算特別搶眼，但其實佢係雲南博物館嘅鎮館之寶嚟架。牛虎銅案成個器形就係一隻站立嘅大牛，腹部中空收藏住一隻小牛，而大牛嘅後部就有一隻猛虎咬住牛尾，畫面相當有寓意。牛係三牲之中嘅首位，而虎喺滇文化當中又有住崇高嘅地位，係經常都有滇人拜祭。成件青銅器當時係用范模鑄造，大牛同猛虎都係一次成型，而小牛就係重新焊接，以當時嘅工藝水平嚟講真係相當高超！難怪內地就流傳住一句「北有馬踏飛燕，南有牛虎銅案」啦！