全國出土最重金器 西漢金獸

繼同大家介紹完北方嘅「馬踏飛燕」同埋南方嘅「牛虎銅案」之後，唔少史友都想阿史繼續介紹多啲我國嘅國寶級文物，咁就當然冇問題啦！今次阿史就揀咗一件號稱係全國出土器物當中最重嘅金器，呢件就係西漢金獸喇！

西漢金獸現藏於南京博物院，係喺1982年喺江蘇省一個莊窖發現到，成件器物呈豹形蜷伏狀，豹頭枕伏喺前腿之上，頸部戴三輪項圈，重量達到9100克，含金量達到99%。據成個器物嘅外形推斷，呢隻金獸好有可能係戰國晚期去到西漢早期所製，佢之所以珍貴，唔單止係因為佢係全國考古發現入面最重嘅一件金器，更重要嘅係呢件器物係應用咗古代金屬鑄造工藝同埋金器捶擊工藝。喺呢兩種技法結合之下，令到全隻金獸身上有住大小一致嘅班紋同時又有不規則圓形。

至於點解會係金豹，專家就估計係同古人視虎豹係神獸，希望可以起到辟邪壓勝嘅作用有關。