日本著名芭蕾舞蹈家松山樹子逝世

據日本共同社報導，日本芭蕾舞界嘅開拓者之一、著名芭蕾舞蹈家松山樹子喺上星期五就因為急性心力衰竭而喺東京嘅屋企逝世，享年九十八歲。有返咁上下年紀嘅史友可能都會聽過松山樹子嘅事蹟，而關於呢位傳奇人物嘅故事，阿史就想再同大家介紹一下。

松山樹子係鹿兒島縣人，早喺1943年就由東洋音樂學校畢業，佢嘅老公清水正夫為咗可以令到佢最大限度咁發展芭蕾事業，不惜放棄自己鍾意嘅建築行業，仲以妻子名義成立「松山芭蕾舞團」，此後就長期致力於芭蕾舞現代化改革同埋中日文化交流工作。

提到松山樹子最經典嘅作品，就莫過於係二十世紀五十年代初果陣，佢將中國優秀歌劇《白毛女》改編並且搬上芭蕾舞台，自己仲親演埋當中嘅女主角。結果呢部《白毛女》廣受中日兩地民眾熱愛，喺1958年開始就多次訪華演出，受到毛澤東、周恩來等國家領導人接見，認真犀利。