喺漫長嘅地質年代當中，有唔少珍貴嘅生物都曾經喺地球生存過，而喺呢啲生物死後，佢哋嘅遺體又或者生活嘅遺留部分就被泥沙掩埋，經過漫長嘅歲月形成化石。唔少科學家都好鍾意研究化石，之但係呢一種化石就真係未必人人都鍾意喇！

近日就有英國嘅科學家公布研究結果，報告入面就指出佢哋發現咗一舊史上最大嘅人類糞便化石，長達20公分寬5公分，喺1972年由英國嘅約克地區發掘出嚟。而當1991年研究團隊為呢舊巨大嘅糞便化石鑑定果陣，其中一位科學家就表示呢舊係佢見過最令人興奮嘅化石，甚至仲用皇冠上嘅珠寶比喻。而由於呢舊化石出土嘅地區後來就成為當地銀行分支機構，所以就直頭用「萊斯銀行糞化石」命名喇！

咁呢舊化石到底有咩成分呢？據糞石學家表示，呢舊大便嘅內容物大概就係食肉同埋麵包所組成，應該係九世紀嘅維京人所留低，而糞便當中仲有唔少寄生蟲，亦都反映呢位維京人經常個胃唔舒服。而呢舊化石本身係喺英國約維克北歐海盜中心展出，但喺2003年果陣就有訪客唔小心整爛咗，令到化石斷裂成3塊，好彩後尾修復得到！

原圖嚟自網絡