唔知史友們有無留意香港其實有唔少子彈電梯，企响電梯窗邊就可以睇到電梯外嘅風光，又心驚又好玩。

電梯即係升降機，呢樣嘢早响十九世紀末就响香港出現，後嚟香港啲樓愈起愈高，電梯就愈嚟愈流行。响上世紀七十年代，香港就開始有子彈電梯出現。子彈電梯本身係一款觀光升降機，由於外形同子彈有幾份相似，所以就因而得名。據了解1974年尖沙咀喜來登酒店落成，仲引入咗全港首部子彈電梯，成為一時佳話。不過講出名，就一定要數到灣仔合和中心嘅子彈電梯。因為呢部電梯由17樓一直升到上56樓。由於夠高又夠快，又可以居高臨下睇晒成個維港，因而成為當時香港其中一個觀光景點，睇風景確一流。

除咗室外嘅子彈電梯，其中唔少地方都有室內子彈電梯，好似尖沙咀帝苑酒店、銅鑼灣時代廣場、香港中央圖書館，都有室內子彈電梯。講起時代廣場，其實以前都有室外子指電梯，但後嚟封咗條電梯槽成為室內電梯，唔知史友們仲記唔記得呢？

原圖：網絡