最近教育局响課程指引裡面,加入咗一啲新建議,其中一點就係鼓勵學生訪問抗日老戰士,從而對抗日戰爭有更深嘅認識。其實東江縱隊故事就有好多,阿史就曾經响訪問一位老戰士時,提及佢同佢家姐嘅故事。

呢位老戰士叫林珍,佢當年係東江縱隊小鬼隊成員,而佢家姐叫林展,係東江縱隊港九大隊成員。林展畢業於港島名校庇理羅士女子中學,成績優異但因家貧無法入讀大學。後嚟抗日戰爭爆發,佢就去咗惠州投身抗戰隊列,之後香港淪陷佢就返咗香港。據林珍憶述,佢家姐由於身份無被人發現,於是就潛入一間為日本人服務嘅公寓做洗衣工,實際上係為咗蒐集情報。响1943年某一日,林珍話當時日本軍人因侮辱林展唔成,於是就話林展偷咗軍票,結果上咗佢哋屋企搜屋,仲當住林珍同佢哋媽媽毒打林展。林展一度被日本軍人打暈,但就俾日軍用水淋醒再打。後嚟日本軍人見林展唔屈服,於是無再追究落去,但林展就被打到遍體鱗傷。

事後林媽媽等林展康復後,就帶著一家大細去咗深圳大鵬灣,林珍就响個陣成為咗小鬼隊成員同護理員。至於林展因精通中、英同日文,於是成為東江縱隊嘅翻譯員。呢張响1944年東江縱隊戰士嘅合影中,唯一一位女士就係林展喇!

原圖:wenweipo