香港民間社團自發海祭劉春祥等多位抗日英雄

喺尋日香港龍鼓洲同埋沙洲嘅兩個海島附近海域之上，就有住一場悼念活動，仲有《歌唱祖國》嘅歌聲。呢一切都唔係冇啦啦發生，而係有熱心嘅民間社團喺呢度舉行劉春祥以及多位抗日英雄嘅祭奠活動。

提起呢位抗日英雄嘅名，相信可能有啲史友已經聽過。劉春祥係屬於喺1942年由港九大隊組成嘅大嶼山中隊，當時劉春祥就係呢支中隊嘅隊長，負責喺大嶼山農村地區一帶展開抗日工作。而喺1943年5月嘅時候，劉春祥就親自帶住6個隊員由東湧出發去龍鼓洲同埋沙洲一帶展開任務，但點知喺路上就遇到日軍伏擊，兩艘日軍炮艇將佢哋嘅船擊沉，船上嘅劉春祥、曾可送、林容、汪送、譚金火、溫發、劉佳等7名指戰員以及船家梁克全家五口壯烈犧牲。

而今年正值係抗日戰爭暨世界反法西斯戰爭勝利75周年，中國退役軍人事務部公佈第三批抗日英雄群體名錄，「劉春祥等十二名龍鼓洲戰鬥犧牲英烈」係當中一份子，呢次海祭亦係入選名錄之後，香港民間組織嘅第一次大規模祭奠活動。