尋日中共中央政治局會議指出，實施一對夫妻可以生育三個子女政策以及配套支持措施，呢個消息又係內地計劃生育政策一大轉變。相信史友們都聽過內地實行一孩政策多年，之但係呢個講法其實有一偏差。

所謂「一孩政策」，即政府提倡「一對夫婦只生育一個孩子」，係內地早响上世紀八十年代計劃生育政策其中一項措施。咁點解會話有偏差呢？因為「一孩政策」並唔係計劃生育政策嘅全部。早响上世紀七十年代，內地總人口高達八億人，為減輕人口過多對糧食及物資供應所造成嘅壓力，所以國家就响提倡計劃生育，而計劃生育亦响1978年正式寫入憲法當中。响1978年發表嘅《關於國務院計劃生育領導小組第一次會議的報告》裡面，明確提出「提倡一對夫婦生育子女數最好一個，最多兩個」。而到咗1980年，就開始提倡「一孩政策」。但响八十年代其實唔係每個地區都只俾夫妻生一個，好似農村戶，就俾獨生女嘅家庭生育二孩，呢個叫做「一孩半政策」。到咗1988年，農民經批准可以間隔幾年後生再第二個小朋友。所以，以往所謂「一孩政策」其實只响城市地區落實執行。呢個亦可以簡單說明，一孩政策並唔完全等同計劃生育。

原圖：中新網