繼續同史友們介紹我國嘅一啲名勝古蹟,講起城牆相信唔少史友都會即時諗起萬里長城,但其實我國犀利嘅城牆唔止得一座,位於南京嘅明城牆亦都相當壯觀架!

南京城牆係明朝初年喺都城南京修築,至今已經有650年以上嘅歷史,一座建築可以有咁長嘅歷史係相當難得嘅一件事,特別係古時科技唔發達都可以做到咁,就更加令人好奇到底當中運用咗咩技術。對於南京城牆屹立不搖嘅秘密,歷來都有唔少傳言,例如就有指朱元璋修建城牆果陣,唔單止用到石灰,仲有用埋糯米,但到底係真定假一直都冇定論。

而早前就有專家為咗了解呢座世界最長、規劃最大、保存最完整嘅城坦到底有咩秘密,就挑選咗明代城牆16個位置抽選樣本,結果就發現當中有五個係存在澱粉類物質,亦都代表用糯米汁築城牆係有可能嘅。而喺有關明朝嘅野史入面,亦都有提到朱元璋對於城牆品質要求高,所以唔單止會用到石灰,仲會用到「秫粥」、糯米,所以喺興建南京城牆果陣民間就有禁糯令,即係禁止百姓種植糯米、禁止民間釀糯米酒飲用。但到底係真係假,就需要對城牆進一步再化驗先知。

原圖嚟自網絡