上兩個星期阿史因公事而見咗一位前任校長,呢位前校長响業界都相當知名,言談中得知佢以往係教中史,响個會度呢位前校長大發偉論,仲話點樣點樣先令中史教育有趣云云,之後佢就話「香港學生最好去內地行下,好似去下祁山就知當年諸葛亮六出祁山有幾困難。

相信唔少人都同呢位阿前校長都聽過三國時期風雲人物諸葛亮「六出祁山」嘅故事,不過呢個故事當中就有未必合乎史實嘅內容。祁山位於甘肅東部,係隴西古道重要據點,只要控制呢個地區,就能夠切斷雍涼同中原嘅連繫,令魏國少咗一個軍備力量。所謂「六出祁山」,其實係關於諸葛亮出兵北伐嘅故事,而呢個故事其中一個致命錯誤,就係諸葛亮根本無「六出祁山」。若果以北伐次數而言,諸葛亮出師北伐亦只係有五次。至於真正响祁山出兵,亦只係得兩次,就係第二次同第四次北伐。咁點解無啦啦會有「六出祁山」呢?呢個講法係嚟自《三國演義》,羅貫中就將諸葛亮事蹟戲劇化,於是就出現咗呢種講法。可能阿前校長慣咗用呢個故仔,嚟引啲學生聽書卦。

原圖:《三國演義》劇照