近日網上就流傳住江西收藏家嘅一張黑白照，貼出呢張相嘅收藏家就聲稱呢張係「少女慈禧照」，之但係經過各大媒體同埋專家討論研究之後，就發現相入面嘅根本就唔係慈禧。

相中人到底係邊個，史友們可能諗都諗唔到，其實呢個係就係珍妃喇！雖然呢位收藏家聲稱自己係對清史十分熟悉，但佢就表示呢次失誤會因為自己收藏得太多清宮舊照先至會擺咗個烏龍咁話！不過話時話，其實相傳珍妃個性活潑好動，亦都好鍾意嘗試新奇事物，到底點解存世嘅照片又得咁少呢？

原來早年珍妃自己都影落唔少自拍，亦都幫光緒影咗唔少相，但呢啲相大部分都被西太后銷毀晒，就連光緒成年後嘅相都冇乜得淨；至於同珍妃有關嘅相亦都只係得返兩張存世，所以收藏家唔知相中人係珍妃都真係唔出奇，而呢次亦都係相當重大嘅發現嚟！

原圖嚟自網絡