澳洲曾以「原住民保護法」強搶土著混血兒童?

早幾日就同史友們提到澳洲嘅黑歷史，提到當時嘅原住民點樣被誘騙被逼成為「人肉動物」去到歐美展出，而其實當時殘酷嘅事唔單止發生喺成年人身上，就連原住民嘅兒童亦都身受其害。

阿史所講嘅呢批兒童，就係被稱為「失竊的一代」嘅澳洲土著、托雷斯海峽島民嘅後裔。喺1905年至1967年間，澳洲政府同埋州政府各自就根據議會法令同埋「原住民保護法」，以「同化政策」嘅名義實行種族歧視同埋文化消滅，喺唔少土著嘅屋企帶走佢哋嘅混血兒童。

而對於呢啲惡行，當時澳洲政府就解釋指，佢哋認為澳洲原住民同埋托雷斯海峽島民「低賤無知」同埋「將會消失」，所以先至強行將接近10萬嘅兒童帶走。呢批兒童被帶走後，就被帶到白人家庭同埋政府機構照顧，經常都受到歧視同虐打，令到佢哋生理同埋心理都大受打擊。更加過份嘅係，當時政府仲會銷毀佢哋親生父母嘅信息，令到佢哋無辦法尋親，真係相當殘忍！