山海關點解被稱為「天下第一關」？

提起中國嘅名勝古蹟，故宮、兵馬俑都同大家介紹唔少，甚至有唔少史友都可能已經去過「打卡」，而今次阿史想介紹嘅呢個地方，就真係未必人人去過，而且親眼望落感覺應該都會幾壯觀。阿史講緊嘅之唔係被稱為「天下第一關」嘅山海關囉！

先同大家解答下一個問題，就係點解山海關會被稱為「天下第一關」。山海關所在嘅地方就係喺燕山同埋渤海之間，呢一段亦都係明長城最東邊嘅關隘，地勢險要，同時亦都係萬里長城東起第一關，所以就有呢個叫法喇！雖然今時今日大家睇到嘅山海關都已經係明洪武十四年（1381年）修築，但早喺戰國時期呢處就已經修築有長城，去到崇禎年間山海關附近就修築埋羅城、衛城、海防城等附屬建築，係當時重要嘅軍事城防體系。

山海關城北倚燕山，南連渤海，所以有「山海」之稱，成個關城周長達到四千米，城高就有14米，厚度仲足足有成7米，認真誇張。而喺千米嘅長城線之上，就分佈咗靖邊樓、牧營樓、鎮東樓、臨閭樓和威遠堂，五座敵樓，合稱「五虎鎮東」，而城中心亦都採用四瓮城拱衛，成個布局就咁諗都覺得宏偉，有機會史友們真係要去睇一睇啊！