鐵達尼嘅故事大家都聽唔少、水下考古嘅發現亦都睇過其他地區嘅新聞，之但係大家又知唔知近排香港就有水下考古隊發現到一個港版鐵達尼遺骸呢？阿史今次就同大家介紹下啦！

其實四面環海嘅香港一向都有唔少水下文物遺留，而上個月就有考古團隊喺橫瀾島一帶嘅海域搵到疑似係百幾年前沉沒嘅「新華輪」殘骸。據了解「新華輪」其實係1921年由英國格拉斯哥船廠制造、1929年喺橫瀾島沉沒嘅集裝箱式客貨輪，長度就有成82.3米、高達6.2米、闊約12.2米，係屬於當時香港招商局。呢艘「新華輪」本身就多災多難，喺1928年就曾經被福建海盜假扮乘客登船搶劫、嚟到1929年就喺上海前往廣州途中因大風大浪而偏離航線，喺橫瀾島北岸觸礁沈船，據當時報道約340人遇難，係百年來最大一宗海難。

而呢次考古團隊係喺2018年開始發現到「新華輪」嘅歷史，並且喺其後兩年不停查閱資料，最後就慢慢縮細範圍搵到呢隻船嘅位置。據了解，沉船位置係喺橫瀾島西北0.5海裏、約28米深海底，船身基本完整，只係周圍都係廢舊漁網，對探索造成好大困難，如果真係想大規模發掘，可能真係需要政府出手先得喇！

原圖嚟自網絡