澳門商人運物資抗美援朝？

上世紀五十年代韓戰期間，已故愛國商人霍英東組織船隊突破封鎖運物資返內地，支援國家抗美援朝，至今仍為人津津樂道。霍英東呢段事蹟相信史友們都知道，咁大家又知唔知當時都有澳門商人都係運物資返內地支持抗美援朝呢？

响韓戰爆發，西方國家對支持朝鮮嘅中國實行禁運。為咗支援國家抗美援朝，幾個嚟自港澳嘅商人就從國外採購大量急需物資運進內地。當時除咗霍英東外，參與其中嘅仲有兩個澳門著名商人，一位係何賢，另一位係馬萬祺。何賢係當時嘅澳門中華總商會理事長，而馬萬祺就係澳門知名實業家，亦係澳門中華總商會會長。

據了解，當時有一間南光貿易公司，原本係為解放海南島和廣西而設立，負責籌集解放軍急需物資，通過澳門進入廣州，係澳門最早嘅中國共產黨背景嘅貿易機構。抗美援朝戰爭爆發後，時任廣州市長葉劍英就指示加快南光公司發展，由南光公司負責並請何賢、馬萬祺等人協助，籌措戰略物資。由於南光公司嘅船有特殊記號，所以船入咗廣州就通行無阻喇。