《大三國志展》蜀漢故地亮相

喺源遠流長嘅中國歷史入面，「三國」呢段歷史因為各種原因而深受世界各地嘅人喜愛，而近日就有一個被稱為21世紀以嚟規模最大嘅三國主題巡迴展喺蜀漢故地亮相，到底呢個展覽有咩睇頭？阿史今次就同大家介紹下啦！

《大三國志展》其實喺國外就已經引發咗熱潮，唔少國家嘅民眾聽到呢個消息就已經好想去參觀，而近日呢個巡迴展就集結咗全國18個省市自治區、36家文博單位嘅160幾件（套）精品文物展出，通過兩大主題「英雄的時代」、「永遠的三國」全面展示三國歷史同埋三國文化。

而呢個展覽當中，單單係國家一級文物就已經有30幾件，真係匯聚咗唔少精品，就好似有目前發現層數最多、最高大完整嘅漢代建築明器七層連閣陶倉樓、漢代銅車馬儀仗俑隊、銅縷玉衣、「偏將軍印章」金印同埋曹操墓出土嘅「魏武王常所用挌虎大戟」石碑等。呢啲文物嘅展出，都可以令到三國時期真實流傳嘅物質世界以及人文面貌得以生動呈現。就咁睇相阿史都覺得有啲心動，唔知幾時先有機會可以親眼見到呢。