《新青年》編輯部舊址開放 沉浸式展覽還原昔日場景

呢幾日位於北京東城區箭杆胡同20號嘅陳獨秀舊居、《新青年》編輯部舊址，經過歷庴一年幾嘅布展，終於就正式向公眾開放。

喺呢個故宮東華門附近嘅建築，其實記載住一段不為人知嘅歷史。喺1915年陳獨秀就喺上海創立咗《新青年》，而去到1917年佢就被蔡元培聘請為北京大學文科學長，隨即就租用咗箭杆胡同呢座清代四合院居住，而《新青年》編輯部亦都搬嚟呢度。而當《新青年》搬到北京之後，唔少北大嘅新派人物都加入呢本雜志，令到《新青年》同北京大學以「一刊一校」形式結合，後來更加出現李大釗、錢玄同、劉半農、胡適、魯迅等一批思想者喺《新青年》上猛烈發聲，成為新文化運動嘅主陣地。

呢個地方唔單止係陳獨秀故居咁簡單，而且仲係作為新文化運動嘅主陣地、係馬克思主義喺中國傳播嘅重要地點，喺呢間屋入面，北房同埋南房就分別推出「歷史上的《新青年》」和「陳獨秀在北京」兩個專題展，分別就等公眾了解到陳獨秀、李大釗等早期思想者關於馬克思主義嘅論述，相當有意思。